نہ قصد کعبہ ہم کو نے سر بت خانہ رکھتے ہیں

نہ قصد کعبہ ہم کو نے سر بت خانہ رکھتے ہیں

تصور دل میں تیرا رات دن جانانہ رکھتے ہیں

صدف ہم کس لیے منت کش باران نیساں ہوں

کہ چشم تر سے ہر آنسو در یک دانہ رکھتے ہیں

خوشی رہوے کہاں یارو بھلا انصاف تو کیجے

یہ دل ہے ایک جس میں ہم غم جانانہ رکھتے ہیں

نہیں کچھ کام اے ہمدم ہمیں اب شیخ و زاہد سے

کہ ہم پیر طریق اپنا مغ میخانہ رکھتے ہیں

سرورؔ اب ان دنوں ہر آشنا بیگانہ وش مجھ کو

خفا آزردہ رنجیدہ خوشی بیگانہ رکھتے ہیں