مشتاق ہو نہ اس چمن کائنات کا

مشتاق ہو نہ اس چمن کائنات کا

کیا اعتبار جلوہ گہہ بے ثبات کا

شیریں ہے قندسے بھی مزا اپنی بات کا

گویا زبان منہ میں ہے ٹکڑا نبات کا

بعد فنا ہے اس لب جاں بخش کا خیال

جاری ہے میری خاک سے چشمہ حیات کا

آیا خیال سیب ذقن وقت انتقال

ہے جاں کنی میں شوق ہمیں میوہ جات کا

آتی ہے یاد تن سے نکلنے لگی ہے جان

ہے روز وصل حق میں مرے دن وفات کا

ساقی کی سخت بات نے ٹکڑے ہی کر دیے

دل تھا بغل میں رند کے شیشہ شراب کا

پامال کر دیا مجھے ترسا بچوں نے فیضؔ

ہوں خواست گار میں بھی در سومنات کا