مرے قاصد کو خدا کے لئے غم ناک نہ کر

مرے قاصد کو خدا کے لئے غم ناک نہ کر

دیکھ کے خط کو مرے گرم نہ ہو چاک‌ نہ کر

ایلچی سے نہیں ہوتا ہے کوئی آزردہ

ناخوشی اس سے تو اے ظالم سفاک نہ کر

ہوں گے عشاق قیامت میں ترے دامن گیر

دور دامن سے بہت گردش افلاک نہ کر

گرد ہو کب سے میں لپٹا ہوں ترے دامن میں

جھاڑ دامن کو نہ برباد مرے خاک نہ کر

جی تو عاشق کے چلے جاتے ہیں ہم راہ رکاب

دیکھ گلگوں کو بہت تند و چالاک نہ کر

پڑ گئی ہوگی کہیں رند کے گھر دختر رز

محتسب اس کی بہت جستجو و تاک نہ کر

اس قدر اس پہ نہ دے جان کہا مان ترابؔ

منہ لگا بہت نہ اس شوخ کو بے باک نہ کر