کیا حیلہ دشواری آؤ بھی جو آنا ہو

کیا حیلہ دشواری آؤ بھی جو آنا ہو

آسان ہے مل لینا لیکن تم اگر چاہو

اے عشق مہیا کر غم ہائے فراواں پھر

آباد مرے دل میں پھراک نئی دنیا ہو

کہتی ہے مری غیرت کیا لطفِ حسیں ساقی

اب غیر بھی اس در پر جب ناصیہ فرسا ہو

بے چین مجھے سن کر وہ دیکھنے آئے ہیں

اے درد ترے صدقے اب اور زیادہ ہو

کیا کیا مجھے حیرت ہے حسن مہ تاباں پر

اے دل نہ کہیں ان کا یہ نقش کف پا ہو

سر کا کے کفن منہ سے دکھلا دو جمال اپنا

تا خلد میں حوروں پر دھوکا نہ تمہارا ہو

تکلیف و اذیت ہے دنیائے محبت میں

دنیا نہ کرے باور باور جو نہ آتا ہو

اشک غم الفت کا اعجاز نہ کچھ پوچھو

گھٹ جائے تو قطرہ ہو بڑھ جائے تو دریا ہو

خود پوچھ رہے ہیں وہ موقع ہے نہ اب چوکو

تم کہہ دو فہیمؔ ان سے جو دل میں تمنّا ہو