اشک آنکھوں میں جگر میں درد سوزش دل میں ہے

اشک آنکھوں میں جگر میں درد سوزش دل میں ہے

اک محبت کی بدولت گھر کا گھر مشکل میں ہے

جب نہ یہ دنیا تھی قائم تو ہمارے دل میں تھا

جب سے یہ دنیا ہے قائم تو ہمارے دل میں ہے

اضطراب تیغ مقتل میں کوئی دیکھے ذرا

صاف ہوتا ہے گماں بجلی کفِ قاتل میں ہے

آج ان کے جور کے شکوے ہیں کیا کیا حشر میں

آج کیسی ان کی رسوائی بھری محفل میں ہے

نزع میں اے نامرادی اس کی تو رہنا گواہ

جو مرے دل میں تمنا تھی وہ میرے دل میں ہے

قتل ہوکر بھی رہا قاتل سے قائم واسطہ

روح میری بن کے جوہر خنجر قاتل میں ہے

اے خیال ترک الفت قہر ہے مٹ جائے گی

یہ جو اک دنیائے غم آباد میرے دل میں ہے

ہوشیار اے رہ روِ راہِ محبت ہوشیار

ہر قدم پرجان کا کھٹکا تری منزل میں ہے

نقص سے خالی نہیں ہوتے حسیں بھی اے فہیمؔ

دیکھ تو سوئے فلک دھبّا مہ کامل میں ہے