دن عید کا ہے جائے یہ خالی نہ کہیں آج

دن عید کا ہے جائے یہ خالی نہ کہیں آج

صدقے ترے مل لے گلے اے ماہ جبیں آج

یہ رنگ گلوں میں نہ حسینوں میں یہ جوبن

عالم میں نظر آتے ہو خوش رنگ تمہیں آج

کیا قدرت باری ہے جو کہلاتے تھے کبھی شاہ

مدفوں ہیں وہی تخت نشیں زیر زمیں آج

تلوا مرا کھجلاتا ہے ہو خیر الہی

یہ وحشت دل پاؤں نہ پھیلاے کہیں آج

مدت ہوئی دیکھے ہوئے اس رشک قمر کو

چھاتی سے لگاؤں جو وہ مل جائے کہیں آج

کی وصل کی درخواست تو ہنس کر کہا اس نے

واللہ میں کل آؤں گا فیاضؔ نہیں آج