محبت میں جو کوئی ہوتے ہیں صادق

محبت میں جو کوئی ہوتے ہیں صادق

انہیں پر ہوتے ہیں معشوق عاشق

مخالف پھر ہمارا کیا کرے گا

ہوا جب یار ہی ہم سے موافق

نہیں کرنے کا اب وعدہ خلافی

کیا ہے اس نے ہم سے عہد واثق

دکھاؤ یارو مرے دل کو لے جاکے

طبیبوں میں اگر ہو کوئی حاذق

وصال اس کا کسی دن ہوگا سنیو

جدائی کا مرض ہے جس کو لاحق

گلی سے یار کی باہر کہاں جائے

کہ ہے وہ جنت الماوائے عاشق

ترابؔ اس کی توجہ کب ادھر ہو

کہاں معشوق کو پروائے عاشق