دیدۂ پر آب کی دریا دلی کچھ کم نہیں

دیدۂ پر آب کی دریا دلی کچھ کم نہیں

ہجر کے مارے ہوؤں کی زندگی کچھ کم نہیں

راز مے خانہ ہو افشا یا وہ پوشیدہ رہے

تشنہ کامان ازل کی تشنگی کچھ کم نہیں

کہہ رہی ہے صبح کے بے نور تاروں کی چمک

تیرگی شام غم کی روشنی کچھ کم نہیں

رہ گذار معرفت تک ہو رسائی یا نہ ہو

جذبہ پرشوق کی وارفتگی کچھ کم نہیں

تو اگر نازاں ہے اپنے حسن پر مہر و مبیں

دل بھی وہ ذرہ ہے جس کی روشنی کچھ کم نہیں

سجدہ مکر و ریا نے کر دیا رسوائے خلق

ورنہ زاہد تیرا ذوق بندگی کچھ کم نہیں

بے خودی شوق میں افسرؔ خودی کا کیا سوال

عشق کے ہر گام پر دیوانگی کچھ کم نہیں