غنچہ مجھ سے ہے چمن سے بہاراں مجھ سے

غنچہ مجھ سے ہے چمن سے بہاراں مجھ سے

جلوہ سامانی عالم کا ہے ساماں مجھ سے

وحشت آگیں ہے گلستاں کا گلستاں مجھ سے

اب تو نظارہ بھی رہتا ہے پریشاں مجھ سے

یوں تو کچھ بھی نہ سہی میری حقیقت لیکن

یہ حقیقت ہے کہ انساں بھی ہے انساں مجھ سے

بس ہے یہ فخر مری چاک‌ گریبانی کو

پاک دامانوں کا ثابت ہے گریباں مجھ سے

اب یہ صورت ہے مرے طرز جنوں کی عرشی

دامن الجھے ہے گریباں سے گریباں مجھ سے