اظہار غم ہستی حد سے نہ گزر جائے

اظہار غم ہستی حد سے نہ گزر جائے

ایسا نہ ہو جینے کا احساس بھی مر جائے

حالات کے طوفان میں کشتی ہے امیدوں کی

ٹکرا کے تھپیڑوں سے کیا جانے کدھر جائے

ایسے کسی سایہ میں سو جانے سے کیا حاصل

جب نیند ذرا ٹوٹے ہر خواب بکھر جائے

قسمت کو بھی کیا کوئی تم زلف سمجھتے ہو

جب چاہو بکھر جائے جب چاہو سنور جائے

ہر رہرو منزل کو شادابؔ یہ لازم ہے

الجھے نہ کہیں دامن کانٹوں سے گزر جائے