جب کبھی ان کی جستجو کی ہے

جب کبھی ان کی جستجو کی ہے

ہر قدم پر نگاہ چوکی ہے

انتہا یہ بھی جستجو کی ہے

عمداً ترک آرزو کی ہے

وہ بھی تھا اک مقام شوق جہاں

ہم نے خود اپنی جستجو کی ہے

سن کے قاصد کی بات یوں خوش ہوں

جیسے خود ان سے گفتگو کی ہے

یوں تو ملنے کو روز ملتے ہیں

رات تو ان سے گفتگو کی ہے

بن گئی ننگ چاک‌ دامانی

جب کبھی خواہش رفو کی ہے

ہر کلی پھول بن کے مرجھائی

یہ کمی فطرت نمو کی ہے

جس پہ دنیا کو فخر ہے اسلمؔ

وہ زباں خاص لکھنوی کی ہے