دل کا گھبرانا عبادت میں اگر جاتا رہے

دل کا گھبرانا عبادت میں اگر جاتا رہے

پھر تو بیشک راز ربی کو بشر پاتا رہے

غیر یکسو کام کوئی بھی نہیں ہوتا کبھی

کوششیں لاکھوں کوئی کر کر کے دکھلاتا رہے

دشمن انساں ہے دوئی دل سے اس کو دور کر

تیغ لا سے اس کے سر کو کاٹ کر لاتا رہے

تیغ لا سے کوٹ الا اللہ کا تسخیر ہو

ماسوا کا ہی نشاں خود میں تو پھر پاتا رہے

صاحب نسبت ہو تب تار تصور جب بندھے

وہ ہی پھر دیدار اللہ کا یہاں پاتا رہے

جز محبت آ نہیں سکتا کبھی وہ دلربا

بات وہ جس سے کہ تیرے پاس وہ آتا رہے

تو ریا کرتا ہے محسنؔ دل میں تو الفت نہیں

حق وہی ہے دل کو جو ہر وقت وہ بھاتا رہے