آبرو محروم کر دیتی ہے اصل یار سے

آبرو محروم کر دیتی ہے اصل یار سے

اس کو جو قربان کر دے وہ ملے دلدار سے

غصہ و جور و ستم جو کہ رقیبوں کا سہے

وہ ہی لے محبوب کو آغوش میں پھر پیار سے

جان و مال و آبرو جو نقد دے سکتا نہیں

وہ نہیں واقف ہے ہرگز عشق کے بیوپار سے

ایسے گیسو اور دہن کا وصف ہو کیسے رقم

آب حیواں اور ظلمت ہے عیاں دیدار سے

آب حیواں کے لیے صحرا نوردی ہے ضرور

مشعل ہمت ہے ظلمت میں تو جا یلغار سے

عشق اللہ تو قلندر ہی کا کاروبار ہے

واسطہ جس کو نہیں ہے ننگ سے اور عار سے

شکر کر محسنؔ قلندر کے غلاموں میں ہے تو

پاک ہے بیشک تو اب ناسوت کے آزار سے