جفا و جور نہ کر مجھ پہ ہر زماں صیاد

جفا و جور نہ کر مجھ پہ ہر زماں صیاد

نہیں یہ طرزِ مدارات میہماں صیاد

قفس میں رکھے ہیں مرجھائے پھول لا لا کر

بہار عمر یونہی ہو تری خزاں صیاد

سنے جو نالے مرے دل کو تھام تھام لیا

مگر سمجھنے لگا ہے مری زباں صیاد

نہیں ہے چاک قفس سے بھی جھانکنے کا حکم

بٹھائے رکھتا ہے ہر سو نگاہباں صیاد

مری اسیری کے باعث ہیں زمزمے میرے

ہوئی ہے میرے لئے میری ہی زباں صیاد

نہ رہنے پائے کسی طرح کا ستم باقی

جو کچھ ہو آج ہی ہوجائے امتحاں صیاد

سلامتی ہے مبارکؔ کمال وحشت میں

بھلا بنائے تو عنقا کا آشیاں صیاد