تمہیں تو نورِ روزِ اولیں ہو

تمہیں تو نورِ روزِ اولیں ہو

ازل کی صبح کے مہرِ مبیں ہو

حسینوں میں انوکھے تم حسیں ہو

بنائے رونقِ دنیا و دیں ہو

کرم کا کیوں نہ محشر میں یقیں ہو

تمہیں آقا شفیع المذنبیں ہو

خرامِ ناز جو فرمائیں آقا

تو ہر آہٹ سرِ عرشِ بریں ہو

نبی تو اور بھی آئے جہاں میں

مگر تم رحمت العالمیں ہو

تمہیں پر ختم ہوتی ہے رسالت

کہ آقا تم ہی ختم المرسلیں ہو

سمائے گا بھلا کیا خوف دل میں

زہے قسمت کہ دل میں تم مکیں ہو

تمہاری ہی وجہ سے دو جہاں ہیں

تمہیں محبوبِ رب العالمیں ہو

تڑپتے ہیں مبینؔ اپنے بھی سجدے

نبی کا آستاں میری جبیں ہو