نہ وہ ذوق ہے نہ وہ شوق ہے نہ وہ کیف ہے نہ سرور ہے

نہ وہ ذوق ہے نہ وہ شوق ہے نہ وہ کیف ہے نہ سرور ہے

ہے ہر ایک چیز ہی بے مزا جو نظر سے اپنی تو دور ہے

کبھی طاعتوں کا سرور ہے کبھی اعترافِ قصور ہے

ہے ملک کو جس کی نہیں خبر وہ حضور میرا حضور ہے

ترا ذکر ہے تری یاد ہے ترا نام تیرا پیام ہے

ہے اگر نصیب تری رضا تو یہ ہجر جانِ حضور ہے

تری یاد دل کی مرے دوا ترا نام روح کی ہے شفا

ترا بھولنا مری موت ہے ترا ذکر حاصل طور ہے

میں برا ہزار سہی مگر ہے کرم پہ تیرے مری نظر

تو کریم ہے تو رحیم ہے مجھے ناز اس پہ ضرور ہے

یہ کرم ہے خاص ترا کرم نہ فدا ہوں کس لیے تجھ پہ ہم

تو نظر میں جب سے سما گیا نظر آتا نور ہی نور ہے

یہ شرف ہے میرا بڑا اہم ترے درپہ میرا جو سر ہے خم

رہوں دوستو! نہ میں کیوں چہ غم جو کرم کا ہوتا ظہور ہے

ترے عشق میں میں فنا رہوں تری یاد ہی میں لگا رہوں

تو کرم سے اپنے مجھے بچا! کہ یہ دور دورِ شرور ہے

جو ہے اہلِ عشق کی ابتدا جو ہے اہلِ عشق کی انتہا

میں بتاؤں احمدؔ بے نوا مرا اعتراف قصور ہے