نہیں رہتے ہیں کیوں ہم چاہیے ہم کو جہاں رہنا

نہیں رہتے ہیں کیوں ہم چاہیے ہم کو جہاں رہنا

کوئی رہنے میں رہنا ہے یہاں رہنا وہاں رہنا

قیامت ہے ترے عاشق کا مجبورِ بیاں رہنا

زباں رکھتے ہوئے بھی اللہ اللہ بے زباں رہنا

مبارک تجھ کو اسرارِ کرم کا رازداں رہنا

مبارک ہو زمیں پر تیرا بن کر آسماں رہنا

کوئی بھی حال ہو ہر حال ہی میں شادماں رہنا

حقیقت میں اسی کا نام ہے بس کامراں رہنا

خرد اس راز سے واقف نہیں ہے حضرت ناصح

محبت ہی سکھاتی ہے عیاں رہنا نہاں رہنا

یہ فیضانِ محبت ہے یہ احسانِ محبت ہے

سراپا داستاں ہوتے ہوئے بے داستاں رہنا

یہی شان محبت ہے یہی آن محبت ہے

انہیں کا ہو کے رہنا چاہے کچھ بھی ہو جہاں رہنا

یہی ضبطِ محبت ہے یہی شرط محبت ہے

تڑپنا رات دن اور اور پھر بھی بے آہ و فغاں رہنا

یہ عرفانِ محبت ہے یہ برہانِ محبت ہے

کہ سلطانِ جہاں ہو کر بھی بے نام و نشاں رہنا

یہ معراجِ محبت ہے یہ اعجاز محبت ہے

ہزاروں زخم کھا کر مسکرانا شادماں رہنا

یہ عرفانِ محبت ہے یہ برہانِ محبت ہے

کہ سلطانِ جہاں ہو کر بھی بے نام و نشاں رہنا

ترے جامِ محبت کا یہ اک ادنی کرشمہ ہے

سرِ دار عاشقوں کا مست ہو کر نغمہ خواں رہنا

جو خوش قسمت ہیں ان کو ہی ملا کرتی ہے یہ دولت

بہ فیضِ عشق صحرا میں بھی بن کر گلستاں رہنا

نہ کوئی راہ پاجائے نہ کوئی غیر آ جائے

حریمِ دل کا احمدؔ اپنے ہر دم پاسباں رہنا