کبھی مضطر، کبھی بیخود، کبھی نالاں ہونا

کبھی مضطر، کبھی بیخود، کبھی نالاں ہونا

الغرض عشق کی فطرت ہے پریشاں ہونا

گلے ملنا ہو کسی کے تو گریباں ہونا

ورنہ پھر عشق میں خاکِ رہِ جاناں ہونا

بڑھ گئی حد سے زیادہ مری ایذا طلبی

زخم دل چاہتے ہیں غرقِ نمکداں ہونا

تھی مگر عینِ کرم میری گنہگاری بھی

وجہ بخشش ہوئی آلودۂ عصیاں ہونا

وحشت عشق سلامت ہے تو انشاء اللہ

آپ دیکھیں گے مرے گھر کا بیاباں ہونا

دل کے احساس نے آفت میں پھنسایا مجھ کو

ورنہ ممکن ہی نہ تھا میرا پریشاں ہونا

نکلے وہ خواب گہِہ ناز سے گھبرائے ہوئے

وقت کی بات ہے نالہ کا پریشاں ہونا

آگیا دور ہے کچھ کفر کا ایسا مختارؔ

جرم اس عہد میں ٹھہر اہے مسلماں ہونا