وہیں سے ابتدا ہوتی ہے اصلِ نور عرفاں کی

وہیں سے ابتدا ہوتی ہے اصلِ نور عرفاں کی

امیدیں ٹوٹ جاتی ہیں جہاں جا کر ہر انساں کی

کھلیں آنکھیں تو عالم دوسرا ہی کچھ نظر آیا

اجل تعبیر نکلی زیست کے خواب پریشاں کی

کہا اس طرح رازِ دردِ دل کوئی نہ کچھ سمجھا

حقیقت آشکارا ہم نے کیا کی اور پنہاں کی

مرا ذمہ نہ ہو بیتاب خود تیرے لیے بخشش

ذرا اشکوں سے دھولے یہ سیاہی دل کے داماں کی

مٹا ڈالی اجل نے آج یہ مختارؔ کی ہستی

وہ تھی اک بولتی تصویر گویا یاس و حرماں کی