نہ وہ اپنے ، نہ دل اپنا ، نہ دل کی یہ خوشی اپنی

نہ وہ اپنے ، نہ دل اپنا ، نہ دل کی یہ خوشی اپنی

بھلا یہ بھی ہے کوئی زندگی میں زندگی اپنی

ازل کی بزم میں ڈالی گئی جو قلب انساں پر

محبت دے رہی ہے آج تک وہ روشنی اپنی

دلِ مرحوم کی میت پہ اب تم بھی کرو ماتم

جسے تم سے تعلق تھا وہ دنیا مٹ چکی اپنی

یہ مرگِ ناگہاں تو بیچ کا تھوڑا سا وقفہ ہے

ازل سے ہے ابد تک زندگی ہی زندگی اپنی

ہماری خیر مانگو دو دعائیں حضرت دل کو

نہ ہوتے ہم تو پھر کس کو دکھاتے بے رخی اپنی

ہوا کوئی نہ جب پرسانِ حال دل محبت میں

بعنوانِ دگر خود ترجمانی میں نے کی اپنی

تمنا ہے کہ اے مختارؔ موت آئے تو یوں آئے

کہ ان قدموں پہ نکلے جا کے اب سانس آخری اپنی