دام میں اس کے نہ آئیگا جو دانا ہوگا

دام میں اس کے نہ آئیگا جو دانا ہوگا

دل ہمارا نہ کبھی مائلِ دنیا ہوگا

لایق سیر نہیں ہے یہ طلسم ہستی

اس کو سمجھے گا وہی جو کوئی بینا ہوگا

حق شناسی نہیں حصہ میں ہر اک کے یارو

سو میں دو ایک کا آئینہ سا سینا ہوگا

لاکھ تکلیف پہ تکلیف ہو خالق کے سوا

کبھی بندہ تو نہیں طالبِ دنیا ہوگا

فخر کی ان سے نہ ہوگی جو خدا والے ہیں

وہ برا سمجھے گا اپنے کو جو اچھا ہوگا

زاہدا گلشن فردوس وہی ہے مجھ کو

کوچہ یار میں مر کر جو ٹھکانا ہوگا

بہر تسکین ترا مثل کہاں سے لاؤں

نہ کوئی تھا نہ کوئی ہے نہ اب ایسا ہوگا

شعر گوئی کا رہا شوق تجھے گر اے فردؔ

ہے یقیں خلق میں تو شاعر یکتا ہوگا