چلا چل کوچہ ٔ جاناں میں اے دل شادماں ہوکر

چلا چل کوچہ ٔ جاناں میں اے دل شادماں ہوکر

کبھی آجا ئیگا وہ بھی ترے گھر میہماں ہوکر

تم اپنے کشتہ کو صاحب ذرا آکر جلاؤ تو

کہاں تم بھاگے پھرتے ہو مسیحائے زماں ہوکر

نہ تم سا خوبرو میں نے کہیں پایا زمانہ میں

بہت دیکھا زمانہ کو پھر ائے اصفہاں ہوکر

تمہارے حسنِ نور افزانے کیں آنکھیں مری روشن

کہاں جاؤگے اے پیارے ان آنکھوں سے نہاں ہوکر

گلستاں جہاں میں بو جب الفت کی نہیں پاتی

رہے یہ بلبل نالاں بتاؤ اب کہاں ہوکر

تپاں ہوں صورت بسمل خدا کے واسطے قاتل

لگا وہ خنجر براں کہ نکلے استخواں ہوکر

گل وبلبل کے نظارہ سے کب وہ شاد ہوتے ہیں

گئے جو باغ جنت میں ہیں اس کے بوستاں ہوکر

مجھے دستِ حنائی یار کا جب یاد آتا ہے

تو اک مدت رہا کرتی ہیں آنکھیں خوں فشاں ہوکر

دھرمؔ کی آرزو یہ ہے کہ تیرے باغ سے اے گل

نہ نکلوں صورت بلبل رہوں میں باغباں ہوکر