اپنے دیوانے پہ کب ان کی نظر ہوتی ہے

اپنے دیوانے پہ کب ان کی نظر ہوتی ہے

کب انہیں درد کے ماروں کی خبر ہوتی ہے

رات فرقت میں بہر طور بسر ہوتی ہے

آپ کیا جانیں کہ کس طرح سحر ہوتی ہے

کان آہٹ پہ نظر جانب در ہوتی ہے

کیفیت شام سے یہ تا بہ سحر ہوتی ہے

یاس کے ساتھ ہی رہتی ہے امید موہوم

ڈوبنے والوں کی ساحل پہ نظر ہوتی ہے

زلف و رخ ہی کے تصور میں رہا کرتا ہوں

عمر کٹتی ہے یوں ہی شام و سحر ہوتی ہے

منزل عشق کو آسان سمجھتے ہو اسیرؔ

یہ تو دشوار بہت راہ گزر ہوتی ہے