درد جب تک کہ لا دوا نہ ہوا

درد جب تک کہ لا دوا نہ ہوا

زندگی کا بھی آسرا نہ ہوا

حوصلے سے جو بڑھ گیا میرے

کبھی پورا وہ مدعا نہ ہوا

حسن وحدت کے سب کرشمے ہیں

ایک کی شکل دوسرا نہ ہوا

کب سے ہم جس کے انتظار میں ہیں

حشر وہ آج تک بپا نہ ہوا

جزو کل سے نہ مل سکا چھٹ کر

بندہ بندہ رہا خدا نہ ہوا

باغ فطرت میں پھر بہار آئی

زرد پتا مگر ہرا نہ ہوا

موت اور زندگی میں ربط ہے کیوں

آج تک طے یہ مسئلہ نہ ہوا

مجھ سے بسملؔ کے واسطے شب غم

کیا ہوا کیا بتاؤں کیا نہ ہوا