تمہیں گر محبت ہماری نہیں ہے

تمہیں گر محبت ہماری نہیں ہے

تو ہم کو بھی چاہت تمہاری نہیں ہے

نہیں ان کے بے دیکھے دل کو تسلی

انہیں کس لیے بیقراری نہیں ہے

ازل سے حسینوں کی الفت ہے ہم کو

یہ خو آج کل کی ہماری نہیں ہے

یہ قسمت جو پڑ جائیں خنجر میں دانتے

وہ قاتل کسی طرح عاری نہیں ہے

یہ پتھر پڑے ہیں زمانہ میں کیسے

بتوں کو ذرا خوف ِباری نہیں ہے

میری جاں یہ سب کھیل کھیلے ہوئے ہیں

یونہی عمر ہم نے گذاری نہیں ہے

یہ کہہ کہہ کے ان سے لڑاتے ہیں آنکھیں

ابھی ہم نے یہ شرط ہاری نہیں ہے

لڑکپن ہے ان کی طبیعت میں اب تک

تحمل نہیں بردباری نہیں ہے

بنے کس طرح سے بنت یا الٰہی

میسر ہمیں ہم کناری نہیں ہے

ہزاروں میں کہہ دوں میں لاکھوں میں کہہ دوں

وہ اگلی سی عادت تمہاری نہیں ہے

مزیبؔ نہ دیتے کبھی دل ہم ان کو

کریں کیا یہ امر اختیاری نہیں ہے