اگر دھوکے سے بے پردہ وہ پردہ دار ہو جائے

اگر دھوکے سے بے پردہ وہ پردہ دار ہو جائے

تو پھر دنیا میں دیوانہ ہر اک ہشیار ہو جائے

بھلے سے آگ لگ جائے نشیمن کو میرے لیکن

نقاب رخ الٹ دو اب ذرا دیدار ہو جائے

نظر بھر کے جسے تم دیکھ لو ان مست نظروں سے

ٹھکانہ اس کا مے خانہ ہو وہ مے خوار ہو جائے

حقیقت کعبہ و بت خانہ کی کوئی بتائے کیا

یہ وہ جانیں جو چشم یار کا بیمار ہو جائے

ہزاروں بجلیاں کڑکے اٹھے طوفان کتنے ہی

مہرباں تم ہو جس بیڑے کے بیڑا پار ہو جائے

تمہارا یہ پری وش حسن صاحب کیا کہیں اس کو

مسلماں دیکھ لے تو صاحب زنار ہو جائے

یہ راہ عشق ہے یاں سر دیے جاتے ہیں نذرانے

جو سر دیدے خوشی سے بس وہی سردار ہو جائے

خدا دشمن کو بھی محفوظ رکھے عشق بازی سے

کوئی بے بس کوئی بے کس کوئی لاچار ہو جائے

مزملؔ ہاں جو دیوانہ تھا دیوانہ تمہارا وہ

اسے دیوانہ آ دیکھے تو اب ہشیار ہو جائے