باغ سے دور خزاں سر جو ٹپکتا نکلا

باغ سے دور خزاں سر جو ٹپکتا نکلا

قلب بلبل نے یہ جانا میرا کانٹا نکلا

تیرے تیروں کی مدارات میں غفلت نہ ہوئی

چھن گیا قلب تو چھدنے کو کلیجہ نکلا

ڈوب جانے کی ہدایت جو کبھی موج نے دی

آنکھ دینے کو حباب لب دریا نکلا

آتش سوز محبت نے جلایا تھا جسے

وہ کلیجہ تیرے پانی سے بھی ٹھنڈا نکلا

جان پاتے ہی قیامت میں تیری یاد آئی

میرا لاشہ مری تربت سے تڑپتا نکلا

جاتے جاتے بھی بڑا ساتھ نباہا مضطرؔ

تیر کے ساتھ ہی سینے سے کلیجہ نکلا