جفا کی باتیں سدا بنانا وفا کی باتیں کبھی نہ کرنا

جفا کی باتیں سدا بنانا وفا کی باتیں کبھی نہ کرنا

خدا کے گھر میں کمی نہیں ہے کیے میں اپنے کمی نہ کرنا

کہیں جو بلبل نے دیکھ پایا تو میری اس کی نہیں بنے گی

چمن میں جانے کو روز جاؤ مگر گلوں سے ہنسی نہ کرنا

بہ وقت قول و قرار ان کو نزاکت ان کی سجھا رہی ہے

وفا کا وعدہ تو خیر کر لو وفائے وعدہ کبھی نہ کرنا

نہیں یہ کہتا میں تجھ سے قاصد کہ ان سے بے وقت حال کہہ دے

مگر جو پہلو نظر سے گزرے تو اس سے پہلو تہی نہ کرنا

ہماری تربت پہ تم جو آنا تو ساتھ اغیار کو نہ لانا

خوشی کے صدمے ہمیں نہ دینا ہمارے غم کی خوشی نہ کرنا

پس فنا میں یہ چاہتا ہوں کہ میری تربت پہ کوئی لکھ دے

کہ اس طرف سے گزرنے والو کسی سے تم دوستی نہ کرنا