نظر جس کی پڑی اس نے پئے سجدہ جبیں رکھ دی

نظر جس کی پڑی اس نے پئے سجدہ جبیں رکھ دی

یہ کیسی دل کشی اس بت میں صورت آفریں رکھ دی

در دل دار پر نعش دل اندوہ گیں رکھ دی

وہیں کی خاک تھی اس واسطے میں نے وہیں رکھ دی

نشانی چھوڑ آیا چاک پیراہن کی کانٹوں پر

کسی پر جیب رکھ دی اور کسی پر آستیں رکھ دی

یہ وہ بدلا ہے سنگ آستاں کی جبہ سائی کا

کہ آئے اور میری قبر پر اپنی جبیں رکھ دی

مصیبت جان دے کر ختم کر دی کوئے جاناں میں

جہاں سے یہ امانت لے کے آیا تھا وہیں رکھ دی

غبار راہ الفت کر کے اوپر ہی بلا لیتا

الٰہی نعش مضطرؔ تو نے کیوں زیر زمیں رکھ دی