جب سے تم کو دل دیا راحت کسی پہلو نہیں

جب سے تم کو دل دیا راحت کسی پہلو نہیں

تم پہ بھی قابو نہیں اور دل پہ بھی قابو نہیں

امتحاں گاہ وفا میں تو بھی چل میں بھی چلوں

آج اے شمشیر قاتل میں نہیں یا تو نہیں

خون دل جتنا تھا سارا وقف حسرت کر دیا

اس قدر رویا کہ میری آنکھ میں آنسو نہیں

حسن صورت میں نمک ہو آنکھ میں تھوڑی کشش

اس سے بڑھ کے کوئی بھی چلتا ہوا جادو نہیں

گلشن عالم کی میں نے ڈالی ڈالی دیکھ لی

پھول تو اچھے ہیں سب لیکن وفا کی بو نہیں

دیکھ کر کعبے کو خالی میں یہ کہہ کر آ گیا

ایسے گھر کو کیا کروں گا جس کے اندر تو نہیں

عاشقی نے عمر ساری بے کلی میں کاٹ دی

چین مضطرؔ کو کسی کروٹ کسی پہلو نہیں