ہم تو سمجھتے تھے کہ اک دن مہرباں ہو جائیں گے

ہم تو سمجھتے تھے کہ اک دن مہرباں ہو جائیں گے

یہ خبر کیا تھی نصیب دشمناں ہو جائیں گے

ایک دن مدفن بھی بے نام و نشاں ہو جائیں گے

خاک کے تودے بھی نذر آسماں ہو جائیں گے

دوستی کی ساری رسمیں زندگی کے ساتھ ہیں

ایک دن سب مہرباں نا مہرباں ہو جائیں گے

یوں لگائیں گے عدم کے جانے والوں کا پتا

مٹتے مٹتے ہم بھی گرد کارواں ہو جائیں گے

آپ آئیں تو سہی ٹھوکر لگانے کے لیے

میری تربت دیکھ کر آنسو رواں ہو جائیں گے

ہے یہی مضطرؔ جو رنگ انقلاب انجمن

ایک دن ہم خواب چشم دوستاں ہو جائیں گے