جلوۂ رخسار ساقی ساغر و مینا میں ہے

جلوۂ رخسار ساقی ساغر و مینا میں ہے

چاند اوپر ہے مگر ڈوبا ہوا دریا میں ہے

وہ تجلی جس نے دشت آرزو چمکا دیا

کچھ تو میرے دل میں ہے اور کچھ کف موسیٰ میں ہے

نوح کا طوفاں تو کچھ دن رہ کے آخر ہو گیا

اور مری کشتی ابھی تک عشق کے دریا میں ہے

ساری دنیا کو دیے جاتا ہے پینے کے لیے

کیا خبر کتنا بڑا ساغر کف مولیٰ میں ہے

اپنے صدقے میں وہ دے گا مجھ کو بھی مضطرؔ عروج

جس کا ذکر پاک سبحان الذی اسریٰ میں ہے