جاگتے کا خواب سمجھو ورنہ دنیا ہے بھی کیا

جاگتے کا خواب سمجھو ورنہ دنیا ہے بھی کیا

اس کی حسرت ہے بھی کیا اس کی تمنا ہے بھی کیا

صرف دھوکے کے لیے نقش سراب دہر ہے

اس سے سب پیاسے گئے یہ موج دریا ہے بھی کیا

سب بنے ہیں عالم فانی میں مٹنے کے لیے

موت کی تمہید سمجھو ورنہ جینا ہے بھی کیا

کچھ نہ تیرا ہے نہ میرا اس بساط دہر میں

صرف دو دن کے لیے یہ تیرا میرا ہے بھی کیا

جیتے جی دیتے ہیں دم مضطرؔ خدا کی یاد میں

مرنے والے یوں بھی مر جاتے ہیں مرنا ہے بھی کیا