مجھے کوسے وہ ظالم یا دعا دے

مجھے کوسے وہ ظالم یا دعا دے

محبت ہو تو یہ سب کچھ مزا دے

مرے دل کی لگی کا فیصلہ کر

خدا را دامن جاناں ہوا دے

نکلتی ہے تمنا جان کے ساتھ

ہجوم نا امیدی راستا دے

جو دل لے کر نہ دے داد‌ محبت

کوئی ایسے سے کیا لے اور کیا دے

وہ آئے ہیں ذرا میں بات کر لوں

اجازت اے دل درد آشنا دے

فرشتے کیوں ستاتے ہیں لحد میں

خدا مالک ہے جو چاہے سزا دے

خدائی چاہتی ہے اس کو مضطرؔ

نصیب اس کا ہے اب جس کو خدا دے