نہ بہک سکا وہ واقف جو ہے تیری رہ گزر سے

نہ بہک سکا وہ واقف جو ہے تیری رہ گزر سے

نہ سنبھل سکا کبھی وہ جو گرا تری نظر سے

نہ یہ سوزش جگر سے نہ یہ ورد کے اثر سے

یہ فغاں مرے لبوں پر ہے مفارقت کے ڈر سے

تیرے صدقے حسن جاناں یہ کہاں کا فیصلہ ہے

جسے دید کی ہو حسرت وہی دیکھنے کو ترسے

مرے آنسوؤں کے قطرے ہیں چراغ راہ منزل

انہیں روشنی ملی ہے تپش دل و جگر سے

مرا سجدۂ محبت کبھی اس طرح ادا ہو

کہ مری جبیں جھکے جب نہ اٹھے تمہارے در سے

یہ دعا ہے سر پہ رکھ کر تری خاک آستاں کو

کہ یہ میرا تاج شاہی نہ جدا ہو مرے سر سے

تیرے میکدے میں ساقی نہیں جب رواج ساغر

تو شعور بادہ نوشی ہو عطا مجھے نظر سے

اسے خلد نے پکارا اسے روحوں نے بلایا

مگر اپنی دھن میں جوہرؔ نہ اٹھا تمہارے در سے