نہ سمجھا عمر بھر کوئی کہ میں بھی تیرا بسمل تھا

نہ سمجھا عمر بھر کوئی کہ میں بھی تیرا بسمل تھا

لبوں پر تھی ہنسی زخموں سے گو چھلنی مرا دل تھا

جھکا سر غیر کے آگے نہ دل دنیا پہ مائل تھا

سروں میں سر مرا سر تھا دلوں میں دل مرا دل تھا

یہ سب مانا کہ وہ سفاک تھا ظالم تھا قاتل تھا

دیا جس کو دیا ہاں پھر کسی کو کیا مرا دل تھا

طریق عشق میں جو جس قدر گم کردہ منزل تھا

وہ بس اتنا ہی اے دل خضر رہ بننے کے قابل تھا

ہزاروں زخم کھا کر بھی نہ تڑپا ہائے مجبوری

بس اک تصویر بے تابی سراپا تیرا بسمل تھا

بہر صورت تھی اک تکلیف بیماریٔ الفت میں

مجھے آسان تھا مرنا مگر پرہیز مشکل تھا

غنیمت ہے کہ مجھ کو قعر دریا نے جگہ دے دی

وبال دوش موج آب تھا میں بار ساحل تھا

خدا مجذوبؔ کو رکھے سلامت اس نے چونکایا

جسے منزل سمجھ رکھا تھا وہ اک خواب منزل تھا