نہ شوکت لے کے آیا ہوں نہ عظمت لے کے آیا ہوں

نہ شوکت لے کے آیا ہوں نہ عظمت لے کے آیا ہوں

محبت لے کے آیا ہوں محبت لے کے آیا ہوں

ازل سے میں تمہاری اک امانت لے کے آیا ہوں

تمہیں دینے کو یہ درد محبت لے کے آیا ہوں

مرے پاس اور کیا ہے بس یہ نالیں ہیں یہ آہیں ہیں

جو سمجھیں آپ بھی دولت یہ دولت لے کے آیا ہوں

اس اک نعمت میں مضمر نعمتیں ہیں کل دو عالم کی

نہیں کوئی بدل جس کا وہ نعمت لے کے آیا ہوں

کوئی کچھ لے کے آیا ہے کوئی کچھ لے کے آیا ہے

میں حیرت لے کے آیا ہوں میں حیرت لے کے آیا ہوں

نہیں مجنون دیوانہ میں ہوں مجذوبؔ مستانہ

ازل سے میں یہ مستانہ طبیعت لے کے آیا ہوں

کسی کے در سے لوٹے ہیں جو سب دامن بھرے اے دل

تو میں مجذوبؔ بھی اک خاص دولت لے کے آیا ہوں