اپنا نشیمن کیا بنائیں گے وہ دوش برق پر

اپنا نشیمن کیا بنائیں گے وہ دوش برق پر

جو چار تنکوں کو چمن میں آشیاں کہتے رہے

ہر چند تھیں پابندیاں لحظہ بہ لحظہ دم بہ دم

ہم درد کے مارے تھے دل کی داستاں کہتے رہے

وہ خانۂ دل جو ہوا ہے مسکن مہر و وفا

ہم اس منور سرزمیں کو آسماں کہتے رہے

یہ زندگی ہوتی گئی پروردۂ جور و جفا

اور انتہائے غم کو ہم آرام جاں کہتے رہے

ذرہ نوازی کا ہے ان کی شکریہ صد شکریہ

جو حضرت نادمؔ کو بھی اہل زباں کہتے رہے