کدورت دل معشوق گل عذار ہوں میں

کدورت دل معشوق گل عذار ہوں میں

ہوا اڑا نہ سکے جس کو وہ غبار ہوں میں

ہجوم داغ محبت میں لالہ زار ہوں میں

خزاں کا خوف نہیں جس کو وہ بہار ہوں میں

مجھے یہ دیتا ہے تسکین وصل کا ارمان

کہ ان کی آنکھوں میں اب نیند کا خمار ہوں میں

یہ ان سے پوچھ کے چلتا ہے مجھ پہ تیر مژہ

دو سار قلب میں ہوں یا جگر کے پار ہوں میں

دکھاؤں کیا دم پیری امنگ اے ساقی

کسی کی چشم کا اترا ہوا غبار ہوں میں

ابھی میں بیٹھا ہوں گرد ملال کی صورت

اٹھوں تو خاطر رنجور کا غبار ہوں میں

طفیل آل محمد نجات ہوگی نجیبؔ

سیاہ کار اگر اور گناہگار ہوں میں