وہ جلوہ جس قدر نزدیک تر ہو دور ہو جائے

وہ جلوہ جس قدر نزدیک تر ہو دور ہو جائے

اگر دل میں سمائے آنکھ سے مستور ہو جائے

اگر حسنِ نظر پر عِشق بھی مغرور ہو جائے

تو اک دن حسن بڑھ کر عشق سے مجبور ہو جائے

یقیناً ان کو دشتِ بیخودی میں ڈھونڈ لیتا ہے

مگر انسان جب اپنے سے کوسوں دور ہو جائے

تغافل کی جلو میں التفاتِ خاص ہوتا ہے

وہ جس کو مے نہ دیں وہ بے پئے مخمور ہو جائے

محبت کی حدوں میں آگیا بس یوں سمجھ لیجے!

جہاں بھی دل کے ہاتھوں آدمی مجبور ہو جائے

یہ دنیا ایک عکسِ جلوہ گاہِ حسن مخفی ہے

اگر پردے نہ ہوں یہ بزم جل کر طور ہو جائے

کسی صورت سے نخشبؔ دل کو یکسوئی تو حاصل ہو

وہ جلوہ عادتاً کیوں فطرتاً مستور ہو جائے