نہ مجھ کو اپنی خبر ہے نہ اپنی جی کی خبر

نہ مجھ کو اپنی خبر ہے نہ اپنی جی کی خبر

یہ حال ہے تو کہو کیا کہوں کسی کی خبر

چمن سے دور پڑا ہوں تو غم نہیں اس کا

صبا سے ملنی ہے مجھ کو کلی کلی کی خبر

ہنسو نہ مرگ وفادار کی خبر سن کر

کہیں اٹھے نہ زمانہ میں اس ہنسی کی خبر

وفا کا حال نہ پوچھو یہ وہ زمانہ ہے

کہ آدمی نہیں لیتا ہے آدمی کی خبر

سنے جو وصل کی انسان تو کیوں نہ ہو خنداں

یہی تو ایک خبر ہے ہنسی خوشی کی خبر

یہاں تو گریہ و زاری ہجوم شوق میں ہے

وہاں سے آئی ہے مہندی کی آرسی کی خبر

کہے تو کون کہے ان سے حال زار مرا

سنائے کون انہیں جا کے بیکسی کی خبر

نسیمؔ کو یہی رونا ہے اب محبت میں

کہ دوستی میں نہ تھی مجھ کو دشمنی کی خبر