گماں کی قید میں تھا اب یقیں کی قید میں ہوں

گماں کی قید میں تھا اب یقیں کی قید میں ہوں

میں ہاں سے چھوٹ گیا تو نہیں کی قید میں ہوں

بڑے ادب سے بٹھایا تھا تخت دل پہ جسے

غضب ہے اب اسی مسند نشیں کی قید میں ہوں

جسے زبان حقیقت میں عشق کہتے ہیں

اسی طلسم جنوں آفریں کی قید میں ہوں

فلک پہ چاند ستارے بلا رہے ہیں اپنے

مگر میں طلعت خاک زمیں کی قید میں ہوں

میں ہوں خود اپنے ہی حسن وجود کا قیدی

کسی حسیں نہ کسی مہ جبیں کی قید میں ہوں

نصیرؔ میں نے عطا کی تھی رستگاری جنہیں

یہ انقلاب تو دیکھو انہیں کی قید میں ہوں