درد سے صورت نجات نہیں

درد سے صورت نجات نہیں

زندگی موت ہے حیات نہیں

نہ سہی رحم تم ستم ہی کرو

میں بھی مانوس التفات نہیں

موت آتی ہے جان جاتی ہے

تم بھی آؤ تو کوئی بات نہیں

تم اور احساس درد رہنے دو

شامل غم تکلفات نہیں

اس میں کونین جلوہ فرما ہیں

مختصر دل کی کائنات نہیں

اب تو یہ حال ہے کہ دل سے بھی

کوئی امید التفات نہیں

اور کچھ دے مجھے مرے مولا

جو ملا ہے اسے ثبات نہیں

سب کچھ اپنے عمل سے ہے رزمیؔ

رنج وغم کچھ مقدرات نہیں