دل سے پوچھا تو نے پایا یار کا کوئی سراغ

دل سے پوچھا تو نے پایا یار کا کوئی سراغ

اس نے دکھلایا ہزاروں داغِ غم بالائے داغ

تھا حریمِ دل قدومِ یار سے رشکِ بہشت

کتنے دن سے ہوگیا یہ خانۂ روشن بے چراغ

راہ بتلاؤ کوئی اے ہم دمو بہرِ خدا!

یار تک جانے کا ہم پاتے نہیں ہرگز مساغ

موسمِ گل تھا و لے گلشن میں کچھ رونق نہ تھی

تیرے آنے سے ہے اے گل اب گلستاں باغ باغ

وقت ہے اب پھر سنبھل اس عمر کو ضائع نہ کر

ورنہ ہم فارغ ہوئے ہم پر نہ تھا الا بلاغ

نعمتیؔ اٹھ چل نبی کا شہرِ یثرب خوب ہے

کب تلک ڈھونڈا کرے گا تو یہاں دل کا فراغ