زہرِ غم میں پی چکا اب کا رسمِ آخر ہے یہ

زہرِ غم میں پی چکا اب کا رسمِ آخر ہے یہ

ایک نظر کا منتظر ہوں ورنہ دم آخر ہے یہ

دم بہ دم دم سست آتا ہے ترے بیمار کا

دم الٹنے بھی لگا اب دم میں دم آخر ہے یہ

عمر آخر ہو چکی اندوہ کے دن کٹ گئے

مژدہ باد اے دل کہ ہم آخر ہیں غم آخر ہے یہ

کیا بچے بیمار سم خوردہ طبیب درد مند

نفع کیا تریاک بخشے کا رسم آخر ہے یہ

ہے عیادت فرض جملہ عاکفانِ کعبہ پر

دل جو تھا عزلت گزیں اندر حرم آخر ہے یہ

زندگی تک تھی یہ ساری آرزو دیدار کی

اب بھی تو آجا کہ اب آخر ہیں ہم آخر ہے یہ

نعمتیؔ بیمار کی پرسش ہے عشاقو ضرور

تھا مذاقِ عشق میں بس مغتنم آخر ہے یہ

نعمتیؔ خوش ہو کہ شہر ماہِ یثرب ہے قریب

منزلیں سب طے ہوئیں بس اک قدم آخر ہے یہ