نہ تو رہے نہ رہے نام صرف یار رہے

نہ تو رہے نہ رہے نام صرف یار رہے

مذاق اہلِ محبت میں اتصال ہے یہ

نہ میں نہ یار نہ نام و نشاں رہے باقی

موحدین کے توحید کا کمال ہے یہ

وجود عین عدم اور عدم ہے عین وجود

نہ اتصال یہاں ہے نہ انفصال ہے یہ

کہاں وجود و عدم اور کہاں حدوث و قدم

نشان و نام تجلی گہ و محال ہے یہ

یہاں نہ حال و محل ہے نہ ہیچ پست و بلند

نہ قرب و بعد نہ بیروں دروں نہ حال ہے یہ

نہ ایں و آں نہ ہماں و ہمیں نہ ہاں نہ نہیں

نہ ما شما و نہ ایشاں نہ حرف دال ہے یہ

نہ رنگ کیف نہ بے کیف نہ عیاں نہ نہاں

نہ جائے دید نہ جائے نادید بے مثال ہے یہ

خیال و وہم خرد سے گماں سے باہر ہے

کسے مجال کہ پاوے اسے محال ہے یہ

ہزار حیف کہ بے حال نعمتیؔ یہ قال

یہ بوالفضولی تری جائے انفعال ہے یہ