دل انسان بھی اللہ جانے کیا تماشہ ہے

دل انسان بھی اللہ جانے کیا تماشہ ہے

ستم کی اس میں بستی ہے کرم کی اس میں دنیا ہے

تو اپنی چاندنی دے کر نہ اے مہتابِ زحمت کر

ہمارے خانۂ تاریک میں غم کا اجالا ہے

قبولیت پہ بیکس کا تیقن اے معاذاللہ

کہ ہے صرف دعا ہر چند محروم تمنا ہے

مرے ذوق نظر نے آبرو بخشی ہے جلووں کو

مری دیوانگی آئینہ دار حسنِ یکتا ہے

جبین بندگی آزاد ہو قید تعین سے

کہ فرق دیر و کعبہ ہی حریف ذوق سجدہ ہے

دیا کرتا تھا دنیا کو کبھی جو درس خود داری

وہی انساں اب منت پذیر اہل دنیا ہے

نیازؔ بے زباں بزمِ سخن میں اور زباں کھولے

یہ سب کچھ حضرت استاد کی صحبت کا صدقہ ہے