ارادے نہ ہوں جب کہ دل کے ارادے

ارادے نہ ہوں جب کہ دل کے ارادے

تو جذب طلب کیوں نہ محشر اٹھا دے

شبِ منتظر کی سحر ہی نہ ہوگی

بجھا دے چراغ تمنا بجھا دے

گذربھی گئی چاند تاروں کی منزل

ہیں اے جستجو اب کہاں کے ارادے

سنوں کیا میں اشکوں کی رنگیں کہانی

محبت کے قصے تو اب بھی ہیں سادے

مری طرح انجام سے با خبر ہو

تو دیکھوں کوئی غنچہ پھر مسکرا دے

جنوں کے سفر کی وہی ابتدا ہے

جہاں ختم ہو جائیں امکاں کے جادے

اگر دیکھنا ہے نیازؔ اپنے جلوے

نظر سے حجاب تعین اٹھا دے