مرا دل نہ تھا الم آشنا کہ تری ادا پہ نظر پڑی

مرا دل نہ تھا الم آشنا کہ تری ادا پہ نظر پڑی

وہ نہ جانے کون سا وقت تھا کہ بنائے خون جگر پڑی

مری زندگی تھی کہ منزل تب و تاب غم میں اتر پڑی

نہ جنوں کی راہگزر ملی نہ خرد کی راہگزر پڑی

جسے چاہے مالک رنگ و بو اسی بے رخی میں نواز دے

میں ادھر تھا منتظر کرم وہ نگاہ ناز ادھر پڑی

ترا کام سیر مدام ہے نہ کہ گلستانوں میں ٹھیرنا

یہ کلی کلی کے فریب میں تو کہاں سے باد سحر پڑی

کوئی موج بحر سے دور ہے تو جبین بحر پہ کیا شکن

تری رحمتوں کو ہوا یہ کیا مری لغزشوں پہ نظر پڑی