پھر چاہے جتنی قامت لے کر آ جانا

پھر چاہے جتنی قامت لے کر آ جانا

پہلے اپنی ذات سے تم باہر آ جانا

تنہا طے کر لوں گا سارے مشکل رستے

شرط یہ ہے کہ تم دروازے پر آ جانا

میں دیوار پہ رکھ آؤں گا دیپ جلا کر

سایا بن کر تم دروازے پر آ جانا

تم نے ہم کو ٹھکرایا یہ ظرف تمہارا

جب تم کو ٹھکرا دیں لوگ ادھر آ جانا

باتوں کا بھی زخم بہت گہرا ہوتا ہے

قتل بھی کرنا ہو تو بے خنجر آ جانا

تم کیوں اپنی سطح پہ ہم کو لانا چاہو

مشکل ہے گہرائی کا اوپر آ جانا

جب تھک جائے ذہن خدائی کرتے کرتے

بندوں سے ملنے بندہ پرور آ جانا

ہم نے یہ تہذیب پرندوں سے سیکھی ہے

صبح کو گھر سے جانا شام کو گھر آ جانا

رستہ رستہ ایک عجائب گاہ مظفرؔ

ہنستی آنکھوں سے جانا ششدر آ جانا